الخميس، 25 نوفمبر، 2010

صبــاح الشوق



صبــاح الشوق لا جاكم من اوقات الفراق امطار
صبــاحٍ من دفـــا قلبي يبي يفتح لكم بابه
وانا لا جيت اصبّحكم أصف من الورود ازرار
والمّ من المطر ريقٍ يبـل الشوق وترابه
صبــاح النور لا أشرق على وجهٍ يهل انوار
صباح الطير لا طلت تغاريده وأسرابه
وتاليها هلا باللي أهلّي به واشب النار
صبوب الشوق يرويها نظور العين وشرابه


الثلاثاء، 23 نوفمبر، 2010

صغيــر الطيــر




تذكــرتك .. وانا بالليل روّاحة
أقاسي همومي وهي مني تقاسيني
وابكي دموعٍ من ذروف العين نوّاحة
أشكي من اوجاعي واسطّرها دواويني
تذكرتك بتالي الشوق وصباحه
نسيت انك على كيفك تراعيني
على كيفك تهين الحب وارواحه
على كيفك تموتني وتحييني
وانا اللي كنتلك بالزين مدّاحه
وشينك ما أشوفه لو تعاديني
قوية لو بسل السيف ورماحه
على حبٍ يعذبني ويشقيني
تخيلتك بكبريتك وقداحة
تولّع نارك بحبي وتكويني
على ذلّك بذلّنّك بتفاحة
واذلّ الحب في قلبي وَاخَلّيني
صغير الطير لو انت بتكسر جناحه
ترى فيك الرجولة طاحت بعيني


يجافيني




يجافيني وانا واقف على بابه
وصوتٍ بالحشا قطّع شراييني
وانادي بالسما طيرٍ وأسرابه
واحمّلها أمانة لا تخليني
ذكرته والقلب هللي تربّا به
صغيرٍ شلته وكبّرته بعيني
عشقته حيل عشقت اهله وأحبابه
وعنوانه رسمته في عناويني
خذا عمري خذا كلي تهنّا به
وآخرها على هجرٍ يكافيني
خطيّــة قلبي الطيب تسلّابه
عروق الود تبكيني تواسيني


الاثنين، 15 نوفمبر، 2010

العشق فيني صريحْ




العشق فيني صريحْ .. وانت في سابع منامْ
والعيون اللي تصيح .. تذرف دموعي سهام
ما على بالك جريح .. ينشد اوقات الغرام!
ما يهمك لو يطيح .. في متاهات الظلام!
بسألك : كيفك مليح ؟..  كيف حبك والوئام ؟
ليه دمي تستبيح .. بنشدك واسأل علام؟
لو تجاوب بستريحُ .. وُترحم اللي ما ينام؟
كنت لك كبشٍ ذبيح .. وانت تذبح في انسجام
دام قلبك لي ضريح .. ما على الدنيا السلام


الأحد، 14 نوفمبر، 2010

يا ليت قلبي



يا ليت قلبي من الحشا منشال
ويا ليت روحي ما بقت فيني
وليتك بقايا ظل أو تمثال
ولّا زمن ما عاد يعنيني
ليتك هبوب الريح أو زلزال
ليّا تمر لابد تيــذيني
حتى تمنيتك بقايا حال
واحوالٍ أقضيها بتفنيني
ليتك على قول المثل ما قال
شين الفعايل والعقل شيني
المشكلة إنك طويل البال
لامن أصك الباب تيجيني
وان قلتلك الله معك يا خال
ما غير هللي يحبب ايديني
الله معك بالحل والترحال
والله معك يا مِكْحلن عيني
ليتك على قولك أنا رجال
اِمن اللبن بالطير تسقينني


السبت، 13 نوفمبر، 2010

إذا أخطيت في حقك



إذا أخطيت في حقك طلبتك لو تسامحني
واذا أخطيت في حقي عذرتك يا بعد ناسي
أنا باقي على حبك وحبك حيل ذابحني
أنا مقسى وكيف اقسى على حسي وإحساسي
غريبة ما توقعتك على ذلٍ تصارحني
وانا أمسك وانا بكره تذكّر لو كنت ناسي
بكيت ودمعتي هلّت على خدٍ يقارحني
واحس الموت ياتيني وانا اشهق آخر انفاسي


الخميس، 11 نوفمبر، 2010

قلّي هويتك


قلّي هويتك بس صوتك لا تعلّــيه
واخفت الأنوار وهدّي .. هدي شوي
قلبك وروحك وانت واللي انت مغليه
والليل والهمس والدقات .. والشي
اللي فجنونك يا رحماك سلّيه
وانشد قصايد من وردٍ ومن مي
قلّي هويتك والعجل فيك خليه
وان قلتها .. بشويش لا تسمّع الحي


الأربعاء، 10 نوفمبر، 2010

انثريني يا نسايم عود



انثريني يا نسايم عود ثمّن انشليني
ضمي ضلوعي واحسبي مليون ضمة
وارفقي لو تحرقي ذا العود فيني
وان بغى المحبوب شمه هاك شمه
مخذله لو يطلبَنّي ماي عيني
ماي عيني ماحرمنّه لو يلمه
وان يبي مني سنة ياخذ سنيني
وان على شرع الوفا أااموت يمه
وان نوى عهد النوى بينه وبيني
ما على عهدٍ يفرقنا .. مذمه
والدوا كل الدوا ما يحتويني
ما احتواني غير عوّادي وسمّه



تبيع الكيف



على كيفك تزاعلني على كيفك تبيع الكيف
على كيفك تراضيني واذل النفس واكابر
غريبة منك يا خلي أذوق المر ليه وكيف!
تراني مو على مودك أجيك اليوم أو باكر
تبي نبعد تبينا اصحاب على بالك سحابة صيف
تصدق لو على كيفي ! أنا بالكيف ما خاطر


الأربعاء، 3 نوفمبر، 2010

طيب تعــال



طيب تعال
وخلّك من خصام الأمــس
أبي أسمع صدى صوتك وأنّاتك
وهمسك وينه الرايق أبيه وبس
تعال نسافر لبكره على متن الشعر ذكرى
وتاخذنا بقايا حس
وأنفاسك وأنفاسي بجوف الليل
بتهمس همس


الاثنين، 1 نوفمبر، 2010

بمتثل لامرك



بمتثل لامرك حبيبي وابتعد
عنك .. وعني ! منت عني مبتعد
بمتثل لامرك لأنك مستبد
قسوتك ياخي قويه للأبد
شوف حالك ليش في وجهي تصد!
ألف بابٍ لو بعدد ما أعد
كنت اظنك للعطايا ما ترد
خاب ظني يوم قلبك تسترد
ما هقيت انك على همي ترد
باقسى أنواع العقوبات وتشد
ما توقعتك تشمّت بي أحد
وانت لي مو أي واحد أو أحد
صرت ندي ! وانا لك ندٍ بند !
وانا هللي كنت لك ظهر وسند !
آاااخ ..
حسرتي ما تحتمل صبر وجلد
بمتثل لامــرك وعنك ببتعــد