الأحد، 31 أكتوبر، 2010

وينه نديمي راح




أسرح مع الرايح وارجع مع الغادي
واضوّي العتمة واهوّن الإصبـــاح
واسمع هديل الطير والبلبل الشادي
وانسج خيوط الفجر .. فجرٍ بعزه لاح
بوقت الضحا طليت من فوقيَ انادي
واشاور بيدّي واروّح المــرواح
يا مارقٍ بالسوق يا طيفيٍ بادي
يا مغلي الديباج يا بايع المسباح
بالله لو تدرون يا ديرة اجدادي
ما خون سري بس سر العشق فضاح
ما بين خل وخل بالتل والوادي
بين الشمس والظل وينه نديمي راح!
النفس ما طابت لا ما ولا زادي
والروح يا ويلاه متقطّعة برماح
وديت قلبي له أرباع واحادي
سري لكم بعطيه والخنجر الذبّاح



الأربعاء، 27 أكتوبر، 2010

عذرك معك



عذرك معك يا خل والله عليك يعين 
جيتك أطيب خاطرك واحبب الأوجاع 
واطبع شفاه الشوق واعانق الروحين 
روحٍ تطاوعني ! والثان ما تنطاع ! 
إما تبين الحين ولا أبيك الحين 
ولا على فرقاك ما تسلم الأوضاع ؟! 
ما همك الا إنت ! وش همك المسكين ! 
كنك عصي الدمع تنشد مع الإيقاع ! 
بودعك الحين وان جيتني بعدين 
والله لسويها والحلف ما ينباع 


الثلاثاء، 26 أكتوبر، 2010

عِـشـــرة قلــوب



في خافقي عِشرة قلوب
قلبٍ  وفا ظلٍ  دفا
وجه القمر عطرٍ هفا
فيه الدوا فيه الشفا
هذا هلي هذا أبوي
نجم بسماي وماخفى
في خافقي عشرة قلوب
قلبٍ صحا شمس الضحا
فرحٍ  لدمعاتي  محا
في عزها دار الرحى  
هي دنيتي هي ميمتي
وان تجرحن ما أجرحا
وبخافقي عشرة قلوب
حيّاك يا وجه البشاير
حامي ضناي نور ومناير
حياك يا وجه الحلا
حياك يا عز وغلا
يا نسمةٍ هلت
يا ضحكةٍ طلت
باصلك غني زان وحلي
عندي مكانك ما خلي
في خافقي عشرة قلوب
يا صاحبي ياهالبشر يا ناس
عندي أنا خمسٍ حواس
هم عزوتي هم قوتي
في علتي في شدتي
تيجان فوق الراس
 في خافقي عشرة قلوب


السبت، 23 أكتوبر، 2010

هديه



أذكرك .. يوم اقبلت تحمل هديه
يوم عيدي .. كم احبك والهدايا
هان عيدي هان حبي والقضيه
مو صعيبه حلها بين القضايا
يا حبيبي هللي ما تصعب عليا
فدوتك لعيون لو تطلب عطايا



الجمعة، 22 أكتوبر، 2010

بذور العز



دلتي شبت وانا يم العرايب
أنطر بشاير من فوق عالي النوق
واسمع دفوف"ن" دقدقت والطرايب
بيض"ن" رطوب الكف والخير معزوق
جابت بذور العز والعز جايب
الحلا والزين وحمولة الذوق
الرطب نصين معقود"ن" وذايب
زعفرانه حر والهيل مشنوق



الخميس، 21 أكتوبر، 2010

بحتسب ربي






ما طلبت انك تروح * ما طلبت المستحيل
ما طلبت الا تزيح * عتمتي وهموم ليل
تنزف ضلوعي قروح * في زوايا المستطيل
ما تشوف اني طريح * أشتكي جرح"ن" ثقيل
يا خسارة !
هدّمت كل الصروح * وانت لي ظل"ن"  ظليل
والغريبه ! تحسب اني مستريح * والتعب حط"ن" وشيل
دام حظي منك يالظالم ينوح * بحتسب ربي وهو نعم الوكيل


الاثنين، 18 أكتوبر، 2010

بنص الزحمه





علقت بنص هالزحمه أدوّر باوجه العشاق
وجوه"ن" ملّت الرحمه ووجه"ن" كُلُبّوه اشواق
وانا ما بين حالاتي ضحية حب مصدومه
ظنوني باستحالاتي نعوق الطير ما لومه
أنا لاجلك هجرت الناس تركت الأهل والديره
شريتك يا قوي الباس وبدّيتك على الجيره
ضنينه قسمتي والله سقتني سم ثعباني
عروق الروح مبتلّه وانا بالحيييل .. اااعاني
ألا يا قسوتك يا خي علقت بنص هالزحمه
رحمني الكووون بصراخي ويمّك ماتت الرحمه


السبت، 16 أكتوبر، 2010

الرابح الأكبر



تمسيني مسااااء الشوق ولا همتك أخباري
أو ني تحت ولا فوق أو ني مو على الطاري
وانا رديت بالجوري ودم"ن" بالهوى ساري
ترى دورك مهو ب دوري وانا خطيت تذكاري
ليا مَنْهيت سلاماتي أبد منهيك يالشاري
فديت اللي يقول الآه وانا الآهات باسراري
بوصلك ترانيمي وبعزفها على اوتاري
عساك الرابح الأكبر بقلب"ن" حييييل جبار"ي"



الجمعة، 15 أكتوبر، 2010

باخر الصفه



يصفّ اشواق وانا الضحكه تحايلني
من المشتاق ؟ سؤال"ن" حبحب الشفّه
واحس اني رجولي ما تشايلني
على بالي يشوف العين واللفه
واهز الراس ولا كنه بطايلني
نسيت اني وقفت بآخر الصفّه


الخميس، 14 أكتوبر، 2010

أنا لك شايل"ن" همّك





أنا لك  شايل"ن" همّك ليا همك حسبت حساب
ترى زول"ن" بحوض الهم حلاة النار في بابه
رحيب العيش لا ضاقت رطيب النفس لو ما طاب
لزيم الراي والشوره حشيم اللوم وعتابه
 قسيم الحظ ما ينسام وسوم الحظ لا من صاب
يصيب اللي على ذله يخون النار واصحابه
وانا عبدٍ رقيق الحال على بابك يدق الباب
رجيتك لا تخليني طليبك وانت تخلابه
عهودك وينها الحلوه هواك وطبعك الغلاب
! قطوف المن والسلوى غليتك لا تغلّابه
أنا لك شايل"ن" همك على بابه أنا بواب
دفنتك هم في صدري لحافه إنت وترابه


الثلاثاء، 12 أكتوبر، 2010

إلى مجموعة انسان - سمو الأميــر الشاعر خالد الفيصل






قالت من انت وقلت مجموعة انسان
شوفك قلايد ماس تبرق بعيني
إنت الفخر إنت القدر إنت السمو للشان
إنت المطر يوم الظما محتار فيني
فيك العطر أنفاس والعود ريان
فيك الحلا مقياس والشين زين"ي"
فيك الأدب والذوق روح"ن" وريحان
فيك الشمايل ورد بارض البساتين"ي"
ربي خلق في الناس أجناس واطيان
وانت العطا والخير بالجيم والسين"ي"
معذور من سماك مجموعة انسان
وحق الذي سوّاك بالله سميني


الاثنين، 11 أكتوبر، 2010

نقطه باول السطر





هذا القدر يومٍ حكم حط النقط فوق الحروف
ما تنمحى والله لويش دام الحكم فيها قدر
ربي خلقني والعيون المح بها حظي واشوف
واصبر على حظي وحظي ما على همه صبر
واعزف معازيفي واقول الآه واوزان الحروف
طقّت معازيفي ودفّ الآه بيدي منفطر
النوح يندب حالتي والشوم تذرف بالسقوف
 واشاطر الناعي وانا مدري بقلبي ينشطر







الأحد، 10 أكتوبر، 2010

يا حامل المكتوب



يا حامل المكتوب هديتي للفائزة Imane Ismuha



يا حامل المكتوب يا طاير"ن" طوّاف
برسل سلاماتٍ واشواق ريميّه
واهدي عناقيدي والظل والصفصاف
والروح والريحان واوراق جوريه
للي طويل البال لا مل ولا عاف
والصيد لا جابه ميّه على ميّه
ليا تشوف البنت من تاخذك بلحاف
بلادم ولا إحساس للراس كوفيه
الحــا فوق المــا والآ - يا - بالقاف
للواثقٍ في جوابه والصافي النيه


الأربعاء، 6 أكتوبر، 2010

ما يطيب الليل






ما يطيب الليل دونك يا حبيبي لا ولا ينفع معه زود الشرابِ"ي"
في غيابك غابت شقوق المغيبِ طيبتك والروق واشواق"ن" عذابِ
شوفتك لا لاحت بعيني تصيبي يا حلا شوفك ويا زين المصابِ
كشختك لا جيت والنور العجيب طلتك توقذ عناقيد الشبابِ 
 بحتريك معانق الليل الصعيبي ! يا بعد كوني ويا كلي ويا"بي"



الثلاثاء، 5 أكتوبر، 2010

على هون البشاير




على هون البشاير جيت انا والليل وافكاري
خذتني لهفتي والشوق ولا حسيت باقداري
تحديت الألم والآه وقلت ارتاح واداري
واعانق آية الرحمن واناجي ربي الباري
ألا يا هالزمن جاير سقاني المر غداري
كواني ما رحم حالي ظلمني بالهوى جاري


آهة في مملكة







السماء زرقاء .. والشمس مشرقة .. وآهةٌ في مملكة 
نافذتها متران .. ومحل منامتها عشرة أمتار
فراشها وثير .. ووسائدها من حرير .. وعند بوابتها تقف بإصرار .. 
ألف علامة استفهام 
الوجه الآخر :
الآذان صماء .. وأجراس جهنم تدق .. وكأس من النار في قصر
والقصر في نهايته اثنان .. أولهما قمرٌ منير .. والآخر بلا ضمير 
وجه محايد :
عيون تائهة .. حالة تأهب .. مشاعر متنازعة 
ومحكمةٌ .. عدالتها السماء .. ولونها من ماء .. ومطرقتها نعم ولاء 
والوجوه ثلاثة : ملك وآهة ومملكة










الاثنين، 4 أكتوبر، 2010

بودعكم يالضنا



من جمر آااااااااهاتي بودعكم واقول :


يا هي زوايا البيت
وبالبيت جدران
ياهي زوايا البيت
وبالروح إنسان 
ياهي يا هالزوايا
يا ضد وعنيدة
يا هي  هاللي دونت
قصة قصيدة
ما لها عنوان
تحكي حكاية
هالضنا
وابطالها
كانت وكان
نفس الزمان
نفس المكان
نفس الهوا هاللي
تنفسنا سوا
تشهد تعابير الدقايق
تكتب أحاديث وحقايق 
نفس الزوايا
وبالبيت جدران
صبح ومسا
ليت وعسى
الله يا الله
يا رب الخلايق
بستودعك
أغلى الخلايق
واغلى زوايا
هي زوايا البيت
وبالروووووح إنسان